काठमाडौं, ११ जेठ । परराष्ट्रमन्त्री शिशिर खनालले नेपालको हवाई क्षेत्रलाई ईयूको कालोसूचीबाट हटाउन सहयोग गर्न युरोपेली संघका सदस्य राष्ट्रहरूसँग आग्रह गरेको छ ।
सोमबार ईयूका राजदूतहरूसँगको भेटमा उनले नेपालले हवाई सुरक्षामा गरेको सुधार र प्रगतिलाई ध्यानमा राख्न अनुरोध गरेको छ । भेटमा मन्त्री खनालले व्यापार, जलवायु, शिक्षा र जनस्तरको सम्बन्धमा नेपाल–ईयू सहकार्य अझ सुदृढ बनाउनुपर्ने बताए ।
साथै, आर्थिक वृद्धि, सेवा प्रवाह सुधार र भ्रष्टाचारविरुद्ध शून्य सहनशीलता सरकारको प्राथमिकता रहेको उल्लेख गरे। उनले जलविद्युत्, पर्यटन, पूर्वाधार र सूचना प्रविधिमा लगानी बढाउन पनि ईयू राष्ट्रहरूलाई आह्वान गरेको हो ।
ईयूकी राजदूत भेरोनिक लोरेन्जोले नयाँ सरकारप्रति ईयूको समर्थन रहेको बताउँदै ई–गभर्नेन्स, डिजिटलाइजेसन तथा अन्य क्षेत्रमा सहकार्य विस्तार गर्ने उद्देश्यले भ्रमण गरिएको जानकारी दिइन् ।
२२ सदस्यीय ईयू प्रतिनिधिमण्डलले मंगलबार प्रधानमन्त्री बालेन्द्र शाह सँग सामूहिक भेट गर्ने कार्यक्रम रहेको छ । टोलीले विभिन्न मन्त्री, निजी क्षेत्र, नागरिक समाज र युवा नेताहरूसँग पनि छलफल गर्नेछ ।
