काठमाडौं, १० जेष्ठ। नेकपा एमालेभित्र अध्यक्ष केपी शर्मा ओलीको बहिर्गमनको विषयले सचिवालय बैठक थप पेचिलो बनेको छ।
अधिकांश पदाधिकारीहरूले नेतृत्व हस्तान्तरणको पक्षमा धारणा राखेपछि ओलीले आज बैठकमा आफ्नो धारणा प्रस्तुत गर्ने भएका छन्।
ओलीले सचिवालयमा उठेका विषय केन्द्रीय कमिटीमा लैजानुपर्ने अडान लिएका छन् भने पदाधिकारीहरू भने ‘पहिले मार्गप्रशस्त, त्यसपछि केन्द्रीय कमिटी’ को पक्षमा उभिएका छन्।
ओलीले आफूविरुद्ध उठेका प्रश्नको एक–एक जवाफ दिने तयारी गरेका छन्। उनले निर्वाचन परिणाममा अन्य नेताहरूको भूमिकाबारे पनि प्रश्न उठाउने संकेत दिएका छन्। साथै, महाधिवेशनबाट निर्वाचित अध्यक्षलाई सचिवालयले हटाउन नमिल्ने तर्क पनि उनले अघि सार्ने भएका छन्।
बैठकमा कार्यविभाजन, स्थानीय तह निर्वाचन योजना तथा पूर्वराष्ट्रपति विद्यादेवी भण्डारीको सदस्यता सम्बन्धी प्रस्ताव पनि छलफलमा छन्।
तर, अध्यक्षको बहिर्गमनको मुद्दाले अन्य एजेण्डा ओझेलमा परेको छ। ओलीको पक्षमा रामबहादुर थापा ‘बादल’ र महेश बस्नेत खुलेका छन् भने अधिकांश पदाधिकारी नेतृत्व परिवर्तनकै पक्षमा देखिएका छन्।
