काठमाडौं, ६ जेठ । सूचना तथा सञ्चारमन्त्री विक्रम तिमिल्सिनाले सरकार प्रेस स्वतन्त्रताप्रति पूर्ण रूपमा प्रतिबद्ध रहेको बताएको छ ।
प्रतिनिधिसभाको आकस्मिक तथा शून्य समयमा उठेका प्रश्नहरूको जवाफ दिँदै उनले संविधानले सुनिश्चित गरेको प्रेस स्वतन्त्रतालाई सरकारले नियन्त्रण गर्न नसक्ने स्पष्ट पारे ।
साथै, स्वतन्त्रतालाई जिम्मेवारीपूर्ण ढंगले प्रयोग गर्न सञ्चारमाध्यमलाई आग्रह गरे । मन्त्री तिमिल्सिनाले सञ्चार क्षेत्रले आफ्नो गरिमा, विश्वसनीयता र ओज कायम राख्दै काम गरे सरकारबाट कुनै हस्तक्षेप नहुने उल्लेख गरेको छ ।
उनले सञ्चारमाध्यम जवाफदेही पनि हुनुपर्ने धारणा राख्दै मर्यादा र सीमाभित्र रहेर पत्रकारिता गर्न सुझाव दिए । त्यस्तै, प्रेस काउन्सिललाई थप प्रभावकारी र सशक्त बनाउने दिशामा सरकारले काम अघि बढाएको जानकारी पनि उनले दिएका छन् । संसद्मा केही सांसदहरूले प्रेस स्वतन्त्रतामाथि हस्तक्षेप हुन लागेको भन्दै चासो व्यक्त गरेका थिए ।
