काठमाडौं, ६ जेठ । प्रतिनिधिसभामा निर्वाचनसम्बन्धी दुई विधेयक दर्ता भएको छ ।
बालेन शाहले प्रतिनिधि सभा सदस्य निर्वाचन (पहिलो संशोधन) विधेयक, २०८३ तथा मतदाता नामावली (पहिलो संशोधन) विधेयक, २०८३ संसद्मा पेश गरेको हो ।
निर्वाचनसम्बन्धी संशोधन विधेयकमा २०७८ सालको राष्ट्रिय जनगणनाको तथ्यांकअनुसार समानुपातिक निर्वाचन प्रणालीमा विभिन्न समुदायको जनसंख्या प्रतिशत समायोजन गर्ने व्यवस्था प्रस्ताव गरिएको छ ।
संविधानअनुसार महिला, दलित, आदिवासी जनजाति, खस आर्य, मधेसी, थारु, मुस्लिम तथा पिछडिएको क्षेत्रको प्रतिनिधित्व सुनिश्चित गर्न प्रतिशत अद्यावधिक गर्न लागिएको जनाइएको छ ।
त्यस्तै, मतदाता नामावलीसम्बन्धी संशोधन विधेयकले यसअघि अध्यादेशमार्फत गरिएका व्यवस्थालाई कानुनी मान्यता दिने उद्देश्य राखेको छ । सरकारले छुट भएका मतदातालाई नामावलीमा समावेश गर्न ल्याएको अध्यादेशलाई अब विधेयकमार्फत संस्थागत गर्न खोजिएको बताइएको छ ।
