काठमाडौं, ६ जेठ । खानेपानी तथा सरसफाइ उपभोक्ता महासंघ नेपाल (फेडवासन) को नेतृत्वमा उपभोक्ताहरूले काठमाडौंको बबरमहलमा प्रदर्शन गर्दै खानेपानीमा लगाइएको कर हटाउन र विद्युत महसुलमा छुट दिन सरकारसँग माग गरेको छ ।
प्रदर्शनका क्रममा सहभागीहरूले स्वच्छ र सहज खानेपानी उपभोक्ताको आधारभूत अधिकार भएको उल्लेख गर्दै सन् २०३० भित्र सबै नागरिकलाई सुरक्षित खानेपानीको पहुँच सुनिश्चित गर्नुपर्ने जनाए । उनीहरूले साना खानेपानी आयोजनाहरूलाई एकीकृत गरी प्रभावकारी बृहत आयोजना सञ्चालन गर्न पनि सरकारको ध्यानाकर्षण गराएका छन् ।
त्यसैगरी, उपभोक्ताहरूले नदी, खोला, कुला तथा पोखरीको संरक्षण, वातावरणीय सन्तुलन कायम गर्न वृक्षारोपण अभियान सञ्चालन, तथा खानेपानी स्रोतहरूको दीर्घकालीन संरक्षणमा राज्यले विशेष पहल गर्नुपर्ने माग गरेका छन् । प्रदर्शनपछि महासंघले आफ्ना मागहरू सम्बोधन गर्न सम्बन्धित निकायलाई ज्ञापनपत्रसमेत बुझाएको जनाएको छ ।
