काठमाडौं, १६ बैशाख । नेपालगञ्जस्थित भेरी अस्पतालका चिकित्सकहरूले सुरक्षाको माग गर्दै आकस्मिक बाहेकका सबै सेवा बन्द गरेका छन्, जसका कारण ओपीडी लगायतका सेवामा आउने बिरामीहरू प्रभावित भएका छन् ।
यो निर्णय ६२ वर्षीया दिलसरा विकको उपचारका क्रममा मृत्यु भएपछि उनका आफन्तले चिकित्सक र अस्पताल प्रशासनमाथि गालीगलौज, हातपातको प्रयास तथा ज्यान मार्ने धम्की दिएको घटनापछि लिइएको हो ।
चिकित्सकहरूले दोषीमाथि कारबाही र आफ्ना लागि सुरक्षाको ग्यारेन्टी नभएसम्म काममा नफर्किने बताएका छन् । नेपाल चिकित्सक संघ भेरी शाखाले २४ घण्टाभित्र संलग्न व्यक्तिहरूलाई नियन्त्रणमा लिएर कानुनी प्रक्रिया अघि बढाउन र स्वास्थ्यकर्मीको सुरक्षा सुनिश्चित गर्न माग गरेको छ ।
अन्यथा देशभर इमरजेन्सी बाहेकका सेवा बन्द गर्ने चेतावनी दिएको छ । अस्पताल प्रशासनका अनुसार बिरामीको उपचारमा कुनै लापरवाही नभएको दाबी गरिएको छ, र असन्तुष्टि भए कानुनी बाटो अपनाउन आग्रह गरिएको छ ।
