काठमाडौँ, ९ बैसाख । सुधन गुरुङले गृहमन्त्री पदबाट राजीनामा दिएका छन् ।
विवादित व्यापारी दीपक भट्टसँग सेयर लगानी सम्बन्धी विषयमा उठेका प्रश्न र सार्वजनिक आलोचनापछि उनले बुधबार पद त्याग गर्ने निर्णय गरेका हुन् ।
सामाजिक सञ्जाल फेसबुक मार्फत सार्वजनिक वक्तव्य जारी गर्दै गुरुङले आजकै मितिदेखि लागू हुने गरी राजीनामा दिएको जानकारी दिएका छन् । उनले चैत १३ गतेदेखि गृह प्रशासनको नेतृत्व सम्हालेका थिए ।
गुरुङले आफ्नो निर्णयलाई नैतिकताको आधारमा लिएको स्पष्ट पार्दै सार्वजनिक पदमा बस्ने व्यक्तिले पारदर्शिता र जवाफदेहिता कायम गर्नुपर्ने बताए ।
पदभन्दा नैतिकता ठूलो हुन्छ, शक्तिभन्दा जनविश्वास महत्वपूर्ण हुन्छ भन्दै उनले जनतामा उठेका शंका आशंकालाई सम्बोधन गर्नु आफ्नो दायित्व भएको उल्लेख गरेका छन् ।
उनले पछिल्लो समय उठिरहेको जेनजी आन्दोलन ले सुशासन र पारदर्शिताको सन्देश दिएको उल्लेख गर्दै सार्वजनिक जीवन स्वच्छ हुनुपर्ने आवश्यकता दोहोयाएका छन् ।
साथै आन्दोलनका क्रममा भएको बलिदानप्रति सम्मान जनाउँदै उनले सरकारमाथि उठ्ने कुनै पनि प्रश्नको उत्तर नैतिकताबाटै दिनुपर्ने बताएका छन् । गुरुङले आफूविरुद्ध उठेका विषयमा निष्पक्ष छानबिन होस् भन्ने चाहना व्यक्त गर्दै पदमा रहँदा स्वार्थको द्वन्द्व देखिन नदिन राजीनामा दिएको स्पष्ट पारेका छन् ।
उनको राजीनामासँगै गृह मन्त्रालयको नेतृत्वमा नयाँ नियुक्ति कसलाई दिने भन्ने विषयमा राजनीतिक छलफल तीव्र हुने अपेक्षा गरिएको छ ।
