काठमाडौं, २० फागुन । निर्वाचन आयोगले प्रतिनिधि सभाको निर्वाचनमा मतदानपछि मत पेटिका कुनै पनि हालतमा परिवर्तन नहुने स्पष्ट पारेको छ ।
बुधबार आयोजित पत्रकार सम्मेलनमा कार्यवाहक प्रमुख निर्वाचन आयुक्त रामप्रसाद भण्डारीले मत पेटिका ढुवानीका क्रममा परिवर्तन हुन नसक्ने बताए ।
उनका अनुसार मतदानपछि सबै दलका प्रतिनिधिले मत पेटिकामा लाहा छाप लगाउने र मतगणनाका बेला सोही छाप जाँच गरिने भएकाले परिवर्तन सम्भव छैन ।
निर्वाचन सुरक्षामा यसअघिकै व्यवस्था कायम राखिएको छ—पहिलो घेरामा नेपाल प्रहरी, दोस्रोमा सशस्त्र प्रहरी र तेस्रो घेरामा नेपाली सेना रहनेछन् ।
दुर्गम जिल्लाका मत पेटिका ढुवानीका लागि सेनाको हेलिकप्टर प्रयोग गरिने पनि आयोगले जनाएको छ ।
