काठमाडौं, १९ फागुन । यही २१ फागुनमा हुने प्रतिनिधिसभा निर्वाचन अनुगमनका लागि राष्ट्रिय मानव अधिकार आयोगले देशैभर टोली परिचालन गरेको छ ।
आयोगका अध्यक्ष, सदस्य तथा पूर्वपदाधिकारी सम्मिलित उच्चस्तरीय टोली काठमाडौँ उपत्यका र अन्य जिल्लामा खटाइएको प्रवक्ता डा. टिकाराम पोखरेलले जानकारी दिएका छन् ।
आयोगले यसअघि निर्वाचनपूर्व अनुगमन गरी सरकार, निर्वाचन आयोग, राजनीतिक दल र उम्मेदवारलाई ध्यानाकर्षण गराइसकेको जनाएको छ ।
निर्वाचन मानव अधिकारसँग जोडिएको विषय भएकाले उत्साहपूर्वक मतदानमा सहभागी हुन आयोगले मतदातालाई अपिल गरेको छ । मौन अवधि सुरु भइसकेको सन्दर्भमा आचारसंहिता पालना गर्न राजनीतिक दललाई आग्रह गर्दै आयोगले स्वच्छ, निष्पक्ष र भयरहित वातावरणमा निर्वाचन सम्पन्न गराउन सरकारलाई निर्देशन दिएको छ ।
साथै स्वास्थ्य, एम्बुलेन्स, सञ्चार, पानी, इन्धनलगायत अत्यावश्यक सेवा सुचारु राख्न सम्बन्धित पक्षलाई अनुरोध गरेको छ ।
