जनकपुर, ११ फाल्गुण। धनुषा निर्वाचन क्षेत्र नं. ३ बाट प्रतिनिधिसभा सदस्यका लागि नेपाली कांग्रेसका उम्मेदवार बिमलेन्द्र निधि ले निर्वाचन प्रचार-प्रसार अन्तर्गत घरदैलो अभियानलाई तीव्र बनाएका छन्।
अभियानकै क्रममा उनी जनकपुर-८ स्थित मुस्लिम टोलमा पुगेर स्थानीय मतदातासँग प्रत्यक्ष भेटघाट तथा संवाद गरेका हुन्।
घरदैलो अभियानका क्रममा निधिले स्थानीय बासिन्दाका समस्या, आवश्यकता र अपेक्षाहरू ध्यानपूर्वक सुने। शिक्षा, स्वास्थ्य, रोजगारी, खानेपानी, सडक तथा सामाजिक सद्भावजस्ता विषयमा मतदाताले उठाएका जिज्ञासामा उनले आफू निर्वाचित भएमा ती सबै विषयलाई प्राथमिकताका साथ सम्बोधन गर्ने प्रतिबद्धता जनाए।
यसै क्रममा निधिले जनकपुरधाम-८ मा चुनावी सम्पर्क कार्यालयको औपचारिक उद्घाटन समेत गरेका छन्।
उक्त सम्पर्क कार्यालयमार्फत स्थानीय मतदातासँग निरन्तर संवाद, सुझाव संकलन तथा निर्वाचनसम्बन्धी गतिविधि प्रभावकारी बनाइने उनको भनाइ छ।
निधिले सबै समुदायलाई समेटेर अघि बढ्ने आफ्नो राजनीतिक दृष्टिकोण स्पष्ट पार्दै समावेशी विकास, आपसी सद्भाव र सहअस्तित्व नै आफ्नो मुख्य एजेन्डा भएको बताए।
“जनताको विश्वास र सहभागिताले मात्र समृद्ध धनुषा निर्माण सम्भव छ,” उनले भने।
स्थानीयवासीहरूले पनि घरदैलो अभियान र सम्पर्क कार्यालय उद्घाटनलाई सकारात्मक रूपमा लिँदै उम्मेदवारलाई नजिकबाट बुझ्ने अवसर मिलेको प्रतिक्रिया दिएका छन्।
चुनाव नजिकिँदै जाँदा बिमलेन्द्र निधिले धनुषा-३ का विभिन्न वडाहरूमा पुगेर प्रचार अभियानलाई अझ सघन बनाउँदै लैजाने जनाएका छन्।
