काठमाडौं, ९ फागुन । जिल्ला प्रशासन कार्यालय रौतहटले गौर नगरपालिकाका विभिन्न क्षेत्रमा आइतबार पनि कफ्र्यु आदेश जारी रहने जनाएको छ ।
जिल्ला सुरक्षा समितिको निर्णयअनुसार प्रमुख जिल्ला अधिकारी दिनेशसागर भुसालले कफ्र्यु निरन्तरता दिने सूचना जारी गरेका हुन् । सूचनाअनुसार दिउँसो १ बजेदेखि लागू कफ्र्यु बिहान साढे ६ बजेसम्म रहनेछ भने अत्यावश्यक सेवाका लागि बिहान साढे ६ बजेदेखि साढे ८ बजेसम्म कफ्र्यु खुकुलो पारिनेछ ।
सो अवधिमा पनि भेला, सभा, जुलुस र प्रदर्शन निषेध गरिएको छ । बिहान साढे ८ बजेदेखि अर्को आदेश नभएसम्म पुनः कफ्र्यु लागू हुनेछ । कफ्र्यु पूर्वमा मुडबलवा गेट, पश्चिममा लालबकैया बाँध, उत्तरमा बसपार्क र दक्षिणमा गौर भन्सार क्षेत्रसम्म लागू गरिएको छ ।
कफ्र्यु उल्लंघन गरे कानुनअनुसार कारबाही गरिने प्रशासनले चेतावनी दिएको छ । शनिबार गौर नगरपालिका–६ स्थित सनगडा गाउँमा दुई समुदायबीच उत्पन्न विवाद हिंसात्मक झडपमा परिणत भएपछि स्थिति नियन्त्रणमा लिन कफ्र्यु लगाइएको हो ।
