जनकपुर, ९ फागुन । धनुषा निर्वाचन क्षेत्र नं. ३ बाट प्रतिनिधिसभा सदस्यका लागि नेपाली कांग्रेस का उम्मेदवार बिमलेन्द्र निधिले निर्वाचन प्रचार–प्रसार अन्तर्गत घरदैलो अभियानलाई तीव्र बनाएका छन् ।
सोही क्रममा उनी नगराइन नगरपालिका वडा नं. ४ फुलगामा टोलमा पुगेर मतदातासँग प्रत्यक्ष भेटघाट तथा संवादमा जुटिरहेका थिए । यसै बीच कार्यक्रम स्थलको आसपासबाट राष्ट्रिय स्वतन्त्र पार्टी (रास्वपा) का समर्थक बताइएका व्यक्तिहरूले ठूलो स्वरमा मोटरसाइकलको हर्न बजाउँदै र्याली निकालेको स्थानीयले बताएका छन् ।
जिस्क्याउने बहानामा निकालिएको उक्त मोटरसाइकल र्यालीले केहीबेर वातावरण तनावग्रस्त बनेको थियो । स्थानीयका अनुसार र्यालीमा सहभागी अधिकांश मोटरसाइकलहरू भारतीय नम्बर प्लेटका देखिएका थिए ।
क्षेत्र नं. ३ मा रास्वपाबाट उम्मेदवार मनिष झा रहेका छन् । स्थानीय प्रशासन र सुरक्षाकर्मीहरूले चुनावी गतिविधि शान्तिपूर्ण राख्न सबै पक्षलाई संयमित रहन आग्रह गरेका छन् ।
