जनकपुर, ९ फागुन । रौतहटको गौर नगरपालिका-६ सबगढामा दुई समुदायबीच उत्पन्न साम्प्रदायिक तनाव पुनः भड्काउने प्रयास गरेको आरोपमा शेख जमशेदलाई जिल्ला प्रशासन कार्यालय रौतहटले नियन्त्रणमा लिएको छ ।
उनलाई नेपाल प्रहरी र सशस्त्र प्रहरीको डीएसपीको कमाण्डमा प्रशासन कार्यालयमा ल्याई सोधपुछ भइरहेको सहायक प्रमुख जिल्ला अधिकारी जितेन्द्रकुमार यादवले पुष्टि गरे ।
स्रोतका अनुसार शुक्रबार सहमतिपछि स्थिति सामान्य बने पनि शनिबार योजनाबद्ध उक्साहटका कारण फेरि तनाव देखिएको थियो । प्रारम्भिक अनुसन्धानले पूर्व वडाध्यक्ष तथा हाल जनमत पार्टी का रौतहट जिल्ला संयोजक शेख जमशेदको संलग्नता संकेत गरेको छ ।
सुरक्षा निकायले सामाजिक सञ्जाल गतिविधि र सम्पर्कहरूको विश्लेषण गर्दै निगरानी बढाएको जनाएको छ। हालसम्म आधिकारिक मुद्दा दर्ता भने भएको छैन ।
