जनकपुर, ९ फागुन । धनुषा निर्वाचन क्षेत्र नं. ४ मा प्रतिनिधिसभा निर्वाचनको माहोल तातेको छ ।
महेन्द्र यादव नेपाली कांग्रेसका तर्फबाट प्रतिनिधिसभा उम्मेदवार, हाल घरदैलो अभियान तथा मतदाता भेटघाटमा व्यस्त देखिएका छन् ।
गाउँ–गाउँ पुगेर मतदातासँग प्रत्यक्ष संवाद गर्दै यादवले स्थानीय समस्या, विकासका आवश्यकता र आगामी दिनमा आफूले अघि बढाउने योजनाबारे जानकारी गराइरहेका छन् ।
सडक, शिक्षा, स्वास्थ्य, रोजगारी र युवा लक्षित कार्यक्रमलाई प्राथमिकतामा राख्दै उनले मतदातासँग विश्वास र समर्थन मागिरहेका छन् । यादवको चुनावी अभियानलाई सशक्त बनाउन कांग्रेसका शीर्ष तथा स्थानीय नेताहरू सक्रिय रूपमा मैदानमा उत्रिएका छन् ।
क्षेत्रीय सभापति कुमरकान्त झा, जिल्ला सभापति योगेन्द्र पजियार, पूर्व मन्त्री शेष नारायण यादव, कांग्रेस नेता सन्तोष यादव तथा चन्द्रमोहन यादव लगायतका नेता तथा कार्यकर्ताहरू अभियानमा निरन्तर सक्रिय छन् ।
स्थानीय स्तरमा संगठन सुदृढ गर्दै मतदाता आकर्षित गर्न कांग्रेसले घरदैलो अभियानलाई प्रभावकारी बनाएको नेताहरूको भनाइ छ । उनीहरूका अनुसार जनतासँग प्रत्यक्ष संवादले पार्टीप्रति सकारात्मक सन्देश गएको छ र यसले निर्वाचन परिणाममा समेत सकारात्मक प्रभाव परेको बताएका छन ।
धनुषा–४ मा चुनाव नजिकिँदै जाँदा कांग्रेसको गतिविधि थप तीव्र बनेको छ भने उम्मेदवार महेन्द्र यादवको सक्रियताले चुनावी प्रतिस्पर्धा अझ रोचक बन्दै गएको छ ।
