जनकपुर,९ फागुन। धनुषा निर्वाचन क्षेत्र नं. ३ का प्रतिनिधिसभा सदस्यका लागि नेपाली कांग्रेसका उम्मेदवार बिमलेन्द्र निधि निर्वाचन प्रचार–प्रसार अन्तर्गत घरदैलो अभियानलाई तीव्र बनाउँदै उनले नगराइन नगरपालिका वडा नं. ४ को पुनें टोलमा पुगेर मतदातासँग प्रत्यक्ष भेटघाट गरेका छन्।
घरदैलो अभियानका क्रममा स्थानीय बासिन्दाले नेता निधिलाई फूलमाला, अबिर तथा नाराबाजीसहित भव्य स्वागत गरेका थिए। सो अवसरमा स्थानीयले क्षेत्रको विकास, शिक्षा, स्वास्थ्य, खानेपानी र रोजगारीका विषयमा आफ्ना समस्या तथा गुनासोहरू राखेका थिए।
नेता निधिले स्थानीयका गुनासा ध्यानपूर्वक सुन्दै कांग्रेस विजयी भएमा विकास र सुशासनलाई प्राथमिकतामा राखेर काम गर्ने प्रतिबद्धता व्यक्त गरे।
उनले जनताको विश्वास र साथले मात्र समृद्ध क्षेत्र निर्माण सम्भव हुने बताउँदै आगामी निर्वाचनमा कांग्रेसलाई मत दिएर समर्थन गर्न आग्रह गरे।
