महोत्तरी, ८ फागुन । महोत्तरी निर्वाचन क्षेत्र नं. ३ बाट प्रतिनिधिसभा सदस्यका लागि स्वतन्त्र उम्मेदवार हरिनारायण यादव यतिबेला घरदैलो अभियानमा सक्रिय देखिएका छन् ।
निर्वाचनको मिति नजिकिँदै जाँदा उनले गाउँ–गाउँ र टोल–टोलमा पुगेर मतदातासँग प्रत्यक्ष भेटघाट तथा संवादलाई तीव्र बनाएका हुन् । घरदैलो अभियानका क्रममा यादवले स्थानीय बासिन्दाका समस्या, आवश्यकता र अपेक्षाबारे ध्यानपूर्वक सुनिरहेका छन् ।
त्यससँगै उनले आफ्नो नीति, कार्यक्रम तथा भावी विकास योजनाबारे जानकारी गराउँदै आफू निर्वाचित भएमा क्षेत्रको समग्र विकासका लागि इमानदार पहल गर्ने प्रतिबद्धता व्यक्त गरिरहेका छन् ।
यादवले शिक्षा, स्वास्थ्य, रोजगारी, सडक तथा खानेपानीजस्ता आधारभूत विषयलाई प्राथमिकतामा राखेर काम गर्ने बताएका छन् । स्थानीय जनताले उठाएका मुद्दालाई प्रतिनिधिसभामा प्रभावकारी रूपमा उठाउने र समाधानका लागि निरन्तर आवाज बुलन्द गर्ने उनको भनाइ छ ।
घरदैलोका क्रममा मतदातासँगको प्रत्यक्ष संवादले जनताको विश्वास जित्न सहयोग पुगेको यादवको बुझाइ छ । स्थानीय स्तरमै पुगेर कुरा राख्दा मतदाताको उत्साह र सहभागिता बढेको देखिएको छ, जसले महोत्तरी–३ को चुनावी माहोललाई थप रोचक बनाएको छ ।
