जनकपुर, ८ फागुन । धनुषा निर्वाचन क्षेत्र नं. ३ बाट प्रतिनिधिसभा सदस्यका लागि नेपाली कांग्रेसका उम्मेदवार बिमलेन्द्र निधि यतिबेला घरदैलो अभियानमा सक्रिय देखिएका छन् ।
निर्वाचन नजिकिँदै जाँदा निधि गाउँ–टोलमा पुगेर मतदातासँग प्रत्यक्ष संवाद गर्दै कांग्रेसका नीति, कार्यक्रम र भावी योजनाबारे जानकारी गराइरहेका छन् ।
यसै क्रममा धनौजी गाउँपालिकाको वडा नं ४ मा आयोजित घरदैलो तथा भेटघाट कार्यक्रममा नेकपा एमालेका जिल्ला सदस्य इ. रामसागर साहसहित दर्जनभन्दा बढी नेता–कार्यकर्ताले नेपाली कांग्रेसमा प्रवेश गरेका छन् । उनीहरूले आगामी निर्वाचनमा बिमलेन्द्र निधिलाई सघाउने प्रतिबद्धतासमेत व्यक्त गरेका छन् ।
कांग्रेस प्रवेश गर्ने नेताहरूले वर्तमान राजनीतिक अवस्थालाई ध्यानमा राख्दै लोकतन्त्र, संविधानको रक्षा र क्षेत्रको समग्र विकासका लागि कांग्रेस उपयुक्त विकल्प भएको धारणा राखेका छन् ।
उनीहरूले बिमलेन्द्र निधिको अनुभव, नेतृत्व क्षमता र विकासप्रतिको प्रतिबद्धताबाट प्रभावित भएर कांग्रेसमा आबद्ध भएको बताएका छन् । कार्यक्रममा बोल्दै उम्मेदवार निधिले पार्टी प्रवेश गर्ने सबैलाई स्वागत गर्दै धन्यवाद ज्ञापन गरे ।
उनले विभिन्न दलबाट आएका नेता–कार्यकर्तालाई सम्मानका साथ जिम्मेवारी दिइने र सबैलाई एकताबद्ध भएर क्षेत्रको विकासका लागि अघि बढाइने बताए ।
“जनताको भरोसा र साथ नै मेरो सबैभन्दा ठूलो शक्ति हो,” भन्दै उनले शिक्षा, स्वास्थ्य, रोजगारी, कृषि र पूर्वाधार विकासलाई प्राथमिकतामा राखेर काम गर्ने प्रतिबद्धता दोहो¥याए ।
