काठमाडौं, ७ फागुन । नेपाली कांग्रेसका सभापति गगन थापाले गठबन्धनको राजनीतिले देशको राजनीति दूषित बनाएको भन्दै अब कांग्रेसले कुनै पनि दलसँग गठबन्धन नगर्ने स्पष्ट पारेका छन् ।
राष्ट्रिय सभागृहमा आयोजित कांग्रेसको प्रतिज्ञापत्रसम्बन्धी सिधा प्रश्नोत्तर कार्यक्रममा उनले पार्टी सञ्चालन र शासनका क्रममा भएका विगतका त्रुटि सच्याएर अघि बढ्ने प्रतिबद्धता जनाए ।
थापाले सत्ता र शक्तिका लागि हुने भागबण्डाको संस्कार अन्त्य गर्ने, सरकार बनेपछि संवैधानिक तथा राजनीतिक नियुक्तिमा पनि भागबण्डा नहुने स्पष्ट गरे।
कांग्रेसको नेतृत्वमा सरकार बने कसैलाई अपमानित हुन नदिने उनले बताए ।
