सप्तरी, ६ फाल्गुन । जनता समाजवादी पार्टी (जसपा) नेपालका अध्यक्ष उपेन्द्र यादवले अधिकार सम्पन्न सङ्घीयताको रक्षा र मधेसको मुक्ति नै पार्टीको मुख्य एजेन्डा भएको बताएका छन् ।
सप्तरीको डाक्नेश्वरी नगरपालिकास्थित पत्थरगाडामा आयोजित युवा–विद्यार्थी भेलामा उनले यी लक्ष्यका लागि जस्तोसुकै संघर्ष गर्न तयार रहेको बताए ।
सप्तरी–३ का प्रतिनिधिसभा उम्मेदवारसमेत रहेका यादवले सङ्घीयता मधेस जनआन्दोलनको उपलब्धि भएको दाबी गर्दै कांग्रेस र एमालेको एजेन्डा नभएको उल्लेख गरे ।
उनले राष्ट्रिय स्वतन्त्र पार्टीले बहुमत पाए सङ्घीयता खारेज गर्न सक्ने आरोप लगाउँदै, प्रदेशमा उम्मेदवार नउठाइनुले नियत प्रस्ट भएको दाबी गरे ।
यादवले मधेसी र उत्पीडित समुदाय अझै अधिकारबाट वञ्चित रहेको, कर्मचारीतन्त्रमा समावेशिता कमजोर भएको र संविधान संशोधन आवश्यक रहेको बताए ।
साथै, शिक्षा क्षेत्र कमजोर पारिँदा मधेसी युवाहरू प्रतिस्पर्धामा पछि परेको भन्दै सचेत रहन आग्रह गरे । आगामी चुनावले मधेसको भविष्य निर्धारण गर्ने उनले जोड दिए ।
