जनकपुर, ६ फाल्गुन । नेपाली कांग्रेसका सभापति गगनकुमार थापाले प्रत्येक नेपालीलाई सम्मानित भएर बाँच्न पाउने नेपाल निर्माण गर्नु नै पार्टीको मूल भिजन भएको बताएका छन् ।
मधेश प्रदेशको जनकपुरमा आयोजित प्रतिज्ञा सभालाई सम्बोधन गर्दै उनले हरेक नागरिकले सपना देख्न र जीवनमै साकार गर्न पाउने वातावरण बनाइने प्रतिबद्धता जनाए ।
थापाले किसान आत्मनिर्भर हुने, शिक्षा र उपचारका लागि ऋण लिन नपर्ने, तथा नागरिक हैरानीबाट मुक्त हुने नेपाल निर्माण गर्ने संकल्प व्यक्त गरे ।
मौलिकतामा गर्व गर्ने र आधुनिकतासँगै अघि बढ्ने, विश्वले स्वाभिमानी राष्ट्रका रूपमा चिन्ने नेपाल बनाइने समेत सभापति थापाले बताएका थिए ।
