जनकपुर, ५ फाल्गुन । धनुषा निर्वाचन क्षेत्र नम्बर–३ मा पछिल्लो समय जनता समाजवादी पार्टीको चुनावी गतिविधि प्रभावकारी बन्दै गएको देखिएको छ ।
विशेषगरी पार्टीको घरदैलो अभियानले स्थानीय मतदाताबीच उल्लेखनीय उत्साह र समर्थन सिर्जना गरेको छ । प्रतिनिधिसभा सदस्यका उम्मेदवार प्रमेश्वर साहको नेतृत्वमा मंगलवार मुखियापट्टी मुसहरनिया गाउँपालिका वडा नम्बर–३ मा सम्पन्न घरदैलो कार्यक्रममा उल्लेखनीय जनलहर देखिएको थियो ।
स्थानीय बासिन्दाहरूले स्वतःस्फूर्त रूपमा सहभागिता जनाउँदै कार्यक्रमलाई सफल बनाएका थिए । घरदैलोका क्रममा उम्मेदवार साहले जनताको दैनन्दिन समस्या, अधिकार, पहिचान र समावेशी विकासका विषयमा आफ्ना धारणा राख्दै परिवर्तनको आवश्यकता औंल्याएका थिए ।
उनले मधेशका जनताको हक–अधिकार सुनिश्चित गर्न तथा समृद्ध र आत्मनिर्भर समाज निर्माणका लागि जनता समाजवादी पार्टी प्रतिबद्ध रहेको स्पष्ट पारे ।
कार्यक्रममा जसपा नेता जितेन्द्र यादबले विगतमा भएका विभेद, उपेक्षा र असमानताबाट मुक्ति पाउन अब नयाँ सोच र नेतृत्व आवश्यक रहेको प्रतिक्रिया दिएका थिए ।
यादबले भने परिवर्तन, अधिकार, पहिचान र समृद्धिको पक्षमा आफूहरूको दृढ समर्थन रहेको भन्दै आगामी निर्वाचनमा साहलाई विजयी गराउने प्रतिबद्धता व्यक्त गरे ।
घरदैलो अभियानमार्फत बढ्दो जनसमर्थनले धनुषा निर्वाचन क्षेत्र नम्बर–३ मा जनता समाजवादी पार्टीको चुनावी पकड थप बलियो बन्दै गएको यादबले बताए ।
