एजेन्शी, तारिक रहमान आज बंगलादेशका नयाँ प्रधानमन्त्रीका रूपमा शपथ लिँदैछन् ।
६० वर्षीय रहमानले मंगलबार संसद्को दक्षिण प्लाजामा पद तथा गोपनीयताको शपथ लिने कार्यक्रम छ। उनी स्वर्गीय पूर्वप्रधानमन्त्री खालिदा जियाका छोरा हुन् र पहिलो पटक प्रधानमन्त्री बनेका हुन् ।
फेब्रुअरी १२ मा सम्पन्न निर्वाचनमा बंगलादेश नेशनल पार्टी (बीएनपी)ले दुई तिहाइभन्दा बढी सिट जित्दै सन् २००६ पछि पहिलो पटक सत्ता पुनः प्राप्त गरेको हो । यो निर्वाचन सन् २०२४ अगस्ट ५ मा शेख हसिनाको सरकार अपदस्थ भएपछि भएको पहिलो चुनाव हो, जहाँ अवामी लिगलाई प्रतिबन्ध लगाइएको थियो ।
शपथ ग्रहण समारोहमा नेपालसहित १३ देशका प्रतिनिधिलाई निमन्त्रणा गरिएको छ । राष्ट्रपति मोहम्मद शहाबुद्दीनले नयाँ मन्त्रिपरिषद्लाई शपथ गराउने कार्यक्रम छ ।
