जनकपुर, ५ फाल्गुन । प्रतिनिधि सभा सदस्य निर्वाचनमा १६ दिन बाँकी रहँदा राजनीतिक दल र स्वतन्त्र उम्मेदवारहरूले प्रचारप्रसार तीव्र बनाएका छन् ।
निर्वाचन आयोगले सोमबारदेखि १८ फागुनसम्म जुलुस, आमसभा र जनसभा गर्न अनुमति दिएपछि देश औपचारिक रूपमा निर्वाचनमय बनेको हो ।
यसअघि घरदैलो र सीमित सभामार्फत प्रचार गरिरहेका दल र उम्मेदवारहरूले अब जनसभामार्फत अभियान अघि बढाएका छन् । आयोगले सभ्य र मर्यादित प्रचार गर्न निर्देशन दिएको छ ।
निर्वाचनमा नेपाली कांग्रेस, नेकपा एमाले, नेपाली कम्युनिस्ट पार्टी, राष्ट्रिय स्वतन्त्र पार्टी, जनता समाजवादी पार्टी नेपाल, राष्ट्रिय प्रजातन्त्र पार्टी, जनमत पार्टी, नेपाल मजदुर किसान पार्टी सहित ६८ दल प्रतिस्पर्धामा छन् ।
आयोगका अनुसार १६५ क्षेत्रमा ३,४८४ उम्मेदवार छन्, जसमध्ये १,१८७ जना स्वतन्त्र उम्मेदवार हुन् । उम्मेदवारहरू मतदाताका मुद्दा बुझ्दै मत माग्न व्यस्त छन्।
२१ फागुनमा हुने निर्वाचनका लागि केही दलले घोषणापत्र सार्वजनिक गरिसकेका छन् भने केही तयारीमा छन् ।
