काठमाडौं, १७ माघ । परवानीपुरमा तीन दिनअघि भएको आमा–छोराको हत्या घटनामा विवाहेत्तर सम्बन्ध मुख्य कारण रहेको निष्कर्षमा प्रहरी पुगेको छ ।
धारिलो हतियार प्रहार गरी ४६ वर्षीया सुमित्रा मण्डल र उनका ३१ वर्षीय छोरा राम ईश्वर मण्डलको हत्या गरिएको थियो भने जगरूप मण्डल र उनकी छोरी घाइते भएका थिए ।
प्रहरीले हत्यामा संलग्न भएको आरोपमा मृतक राम ईश्वरकी पत्नी २३ वर्षीया मनिता देवी मण्डल र उनका प्रेमी २७ वर्षीय धर्मेन्द्र महतो धानुकलाई पक्राउ गरेको छ ।
धर्मेन्द्र यूएईमा काम गर्दै आएका र मनिताकै योजनाअनुसार घटना हुनुभन्दा दुई दिनअघि नेपाल आएको खुलेको छ ।
प्रारम्भिक अनुसन्धान अनुसार माघ १४ गते राति धर्मेन्द्रले चक्कु प्रयोग गरी पूर्वयोजनाअनुसार हत्या गरेका हुन् । घटनामा मनिता पनि सामान्य घाइते भएकी थिइन् ।
उनीहरूलाई ज्यानसम्बन्धी कसुरमा पाँच दिनको म्याद लिएर थप अनुसन्धान भइरहेको प्रहरीले जनाएको छ ।
