जनकपुर, १७ माघ । जनमत पार्टीका अध्यक्ष तथा प्रतिनिधिसभा सदस्यका उम्मेदवार सिके राउतले राष्ट्रिय स्वतन्त्र पार्टी (रास्वपा)लाई संघीयताविरोधी शक्ति भन्दै मधेशबाट यस्ता दललाई पराजित गर्नुपर्ने बताएका छन् ।
उनले संघीयता खारेज गर्ने एजेन्डा बोकेका शक्तिहरूलाई मधेशले स्वीकार नगर्ने स्पष्ट संकेत गरेका छन् । राउतले सामाजिक सञ्जालमार्फत टिप्पणी गर्दै कुनै एक व्यक्तिले निर्वाचनको मुखमा दिएको अभिव्यक्तिले पार्टीको वास्तविक नीति नझल्किने बताए ।
उनका अनुसार पार्टीको केन्द्रीय समिति र संसदीय दलको बैठकबाट पारित नीति र निर्णय नै निर्णायक हुने गर्छ । पार्टीका कुनै एक नेताले मधेशको मत तान्न चुनावको समयमा दिएको अभिव्यक्तिले केही फरक पर्दैन,’ उनले लेखेका छन्, ‘पार्टी कुन दिशामा जान्छ भन्ने कुरा केन्द्रीय समिति र संसदीय दलको निर्णयले निर्धारण गर्छ ।
उनले रास्वपाले संघीयता खारेज गर्ने एजेन्डा निरन्तर रूपमा अघि सार्दै आएको दाबी गरे । ‘संघीयता खारेज गर्नु रास्वपाको निरन्तरको एजेन्डा हो, यो पार्टीले बैठकबाटै निर्णय गरेको विषय हो,’ राउतको भनाइ छ ।
त्यसैले मधेशले यस्ता संघीयताविरोधी शक्तिलाई पराजित गर्दै अघि बढ्नु नै मधेशी शहीदप्रतिको साँचो सम्मान हुने उनले बताएका छन् ।
यसअघि सत्ता गठबन्धनमा रहँदा पनि राउतले रास्वपा सभापति रवि लामिछानेमाथि अन्याय भएको भन्दै सहानुभूति जनाउँदै आएका थिए।
तर पछिल्लो समय जनकपुरधाममा रास्वपाका वरिष्ठ नेता बालेन्द्र शाह (बालेन) को सक्रियतापछि राउतले रास्वपाको नीति, मुद्दा र नेताहरूका अभिव्यक्तिमाथि कडा आलोचना गर्न थालेका छन् ।
सप्तरी–२ बाट उम्मेदवार रहेका राउतको पछिल्लो अभिव्यक्तिलाई मधेश केन्द्रित राजनीतिमा संघीयताको मुद्दालाई पुनः तीव्र बनाउने प्रयासका रूपमा देखिएको छ । 
