विराटनगर, १३ माघ । ओखलढुंगाको चिशंखुगढी गाउँपालिका–६ भदौरेमा वृद्ध दम्पतीको विभत्स हत्या भएको छ ।
भदौरेको बोहोरे टोलमा ८० वर्षीय चन्द्र विक्रम राई र उनकी पत्नी चन्द्रमाया राईको लुटपाटपछि हत्या गरिएको अवस्थामा शव फेला परेको प्रहरीले जनाएको छ । स्थानीयका अनुसार दम्पतीले घरमै सानो किराना पसल सञ्चालन गर्दै आएका थिए ।
सोही पसलमा लुटपाट गरी उनीहरूको हत्या गरिएको प्रारम्भिक अनुमान गरिएको छ । घटना सार्वजनिक भएपछि गाउँमा त्रास फैलिएको छ भने स्थानीयले सुरक्षाप्रति गम्भीर चिन्ता व्यक्त गरेका छन् ।
वडाअध्यक्ष बलराम कटवालले पसलमा भएको लुटपाटपछि दम्पतीको हत्या गरिएको पुष्टि गर्दै पछिल्लो समय सो क्षेत्रमा लगातार आपराधिक घटनाहरू बढ्दै गएको बताए ।
जिल्ला प्रहरी कार्यालय ओखलढुंगाका प्रमुख प्रहरी नायव उपरीक्षक मदन केसीका अनुसार घटनाको जानकारी पाउनासाथ प्रहरी टोली घटनास्थल पुगेको छ।
उनले आफू पनि घटनास्थलतर्फ जाँदै गरेको र घटनाबारे विस्तृत अनुसन्धान सुरु गरिएको जानकारी दिए । उल्लेखनीय छ, एक महिनाअघि यही चिशंखुगढी–६ भदौरेमा ६० वर्षीय शोभितमान थापामगर र उनकी पत्नी रत्नमाया थापामगरको पनि हत्या भएको थियो ।
उक्त घटनामा संलग्न आरोपमा चार जना पक्राउ परिसकेका छन् । लगातार दुई दम्पतीको हत्या भएपछि स्थानीयवासीमा भय र आक्रोश बढेको छ।
प्रहरीले पछिल्लो घटनाबारे थप विवरण आउन बाँकी रहेको जनाएको छ ।
