काठमाडौं, १२ माघ । फागुन २१ मा हुने प्रतिनिधिसभा निर्वाचनका लागि देशभर १०,९६७ मतदान स्थल निर्धारण गरिएको छ। सुरक्षा दृष्टिले मतदान स्थलहरू सामान्य, संवेदनशील र अति संवेदनशील तीन वर्गमा विभाजन गरिएको छ।
जिल्ला सुरक्षा समितिको सिफारिस अनुसार २,८४५ स्थल सामान्य, ४,४४२ स्थल संवेदनशील र ३,६८० स्थल अति संवेदनशीलमा वर्गीकृत गरिएको प्रहरी प्रवक्ता डीआईजी अबिनारायण काफ्लेले जानकारी दिए।
उपत्यकामा १२ वटा मतदान स्थल मात्रै अति संवेदनशील छन्, जुन सबै ललितपुरमा रहेका छन्। काठमाडौं र भक्तपुरमा अति संवेदनशील स्थल छैन। मधेस प्रदेशमा सबैभन्दा धेरै १२ सय ४६ स्थल अति संवेदनशील सूचीमा छन्।
अन्य प्रदेशमा अति संवेदनशील स्थलको संख्या: लुम्बिनी–४६२, सुदूरपश्चिम–४८१, कोशी–४३९, बागमती–३५४, गण्डकी–३२८, कर्णाली–३५८।
अति संवेदनशील स्थलमा बढी सुरक्षाकर्मी खटाइने योजना छ। मतदान स्थलको सुरक्षा तीन तहको घेरामा हुनेछ – भित्री घेरामा नेपाल प्रहरी र निर्वाचन प्रहरी, दोस्रोमा सशस्त्र प्रहरी, र तेस्रोमा सेना। निर्वाचनमा ७३ हजार प्रहरी, ७९ हजार सेना र ३ लाख १५ हजार सुरक्षाकर्मी परिचालित हुनेछन्।
