काठमाडौं, १२ माघ । आगामी फागुन २१ गते हुने प्रतिनिधिसभा सदस्य निर्वाचनका लागि समानुपातिकतर्फको मतपत्र छपाइ कार्य सम्पन्न भएको छ ।
जनक शिक्षा सामग्री केन्द्र लिमिटेड, सानोठिमीमा समानुपातिक प्रणालीअन्तर्गत दुई करोड आठ लाख ५० हजार प्रति मतपत्र छापिएको केन्द्रले जनाएको छ ।
केन्द्रका प्रबन्ध निर्देशक यदुनाथ पौडेलका अनुसार निर्वाचन आयोगको निर्देशनअनुसार तोकिएको समयमै समानुपातिकतर्फको मतपत्र छपाइ पूरा गरिएको हो ।
मतपत्रको सुरक्षा, गोपनीयता र गुणस्तरमा विशेष ध्यान दिँदै छपाइ गरिएको उनले बताए । केन्द्रले यसअघि नै १० लाख ९८ हजार २०० प्रति नमूना मतपत्र छपाइ गरी निर्वाचन आयोगलाई बुझाइसकेको जनाएको छ ।
नमूना मतपत्र मतदाता शिक्षाका लागि प्रयोग हुँदै आएको छ । समानुपातिकतर्फको छपाइ सकिएसँगै केन्द्रले आजैबाट प्रतिनिधिसभा सदस्य निर्वाचनको प्रत्यक्षतर्फको मतपत्र छपाइ कार्य सुरु गरेको छ ।
निर्वाचन नजिकिँदै गर्दा आवश्यक सामग्री समयमै उपलब्ध गराउने तयारी तीव्र पारिएको केन्द्रले जनाएको छ ।
