जनकपुर, १२ माघ । जनता समाजवादी पार्टी, नेपाल (जसपा) ले आइतबार राति आफ्नो चुनावी घोषणा पत्र सार्वजनिक गरेको छ ।
घोषणापत्रमा जसपाले अघिल्ला दस्तावेजभन्दा फरक नयाँ राजनीतिक, संरचनात्मक र नीतिगत एजेन्डा अघि सारेको छ । घोषणापत्रमा संविधान संशोधन मात्र नभई आवश्यक परे पुनर्लेखनसम्मको प्रस्ताव, प्रत्यक्ष निर्वाचित कार्यकारी राष्ट्रपति प्रणाली, संघीयताको सुदृढीकरण तथा १०+१ राज्य संरचनाको अवधारणा समेटिएको छ ।
यस्तै, समावेशितालाई राजनीतिक प्रतिनिधित्वबाट आर्थिक अधिकारसम्म विस्तार गर्ने, युवालाई स्टार्टअप पूँजीमार्फत उद्यमशील बनाउने, भ्रष्टाचारविरुद्ध शून्य सहनशीलता अपनाउने तथा शिक्षा, स्वास्थ्य र रोजगारीलाई राज्यको दायित्वका रूपमा स्थापित गर्ने प्रतिबद्धता गरिएको छ ।
जसपाले जनसंख्या अनुसारको प्रतिनिधित्व सुनिश्चित गर्न निर्वाचन प्रणाली र क्षेत्र पुनर्संरचनाको प्रस्ताव पनि अघि सारेको छ । 
