काठमाडौं, २७ पुस । १८ महिनाअघि सिमलतालबाट त्रिशूली नदीमा खसेर बेपत्ता भएका दुई बसमध्ये एउटाको अवशेष फेला परेको छ ।
दुर्घटनास्थलबाट करिब ३ सय मिटर तल नदी किनारको बालुवामा गाडिएको अवस्थामा बसको ड्राइभरतर्फको चक्का र केही टिनका भाग भेटिएको हो ।
स्थानीयले देखेपछि प्रहरीलाई जानकारी गराएका थिए । प्रहरीले अवशेषको पुष्टि गर्दै उत्खनन र पहिचान प्रक्रिया सुरु गरेको छ ।
फेला परेको अवशेष पहिरोले बगाएको सोही बस हो वा होइन भन्नेबारे प्राविधिक परीक्षणमार्फत अनुसन्धान भइरहेको प्रहरीले जनाएको छ ।
२०७१ असार २८ गते बिहान करिब ३ बजे सिमलतालमा लेदोसहितको पहिरो खस्दा दुईवटा बस त्रिशूली नदीमा खसेर बेपत्ता भएका थिए।
दुर्घटनामा वीरगन्जबाट काठमाडौँ आउँदै गरेको बागमती प्रदेश–०३–००६ ख १५१६ नम्बरको एन्जल डिलक्स बस र काठमाडौँबाट गौरतर्फ जाँदै गरेको बागमती प्रदेश–०३–००१ ख २४९५ नम्बरको गणपति डिलक्स बस परेका थिए।
दुर्घटनाका समयमा दुईवटा बसमा गरी ६५ जना यात्रु सवार थिए। तीमध्ये तीन जना घाइते अवस्थामा उद्धार भएका थिए भने ११ जनाको शव फेला परेको थियो।
बाँकी ५१ जना यात्रु हालसम्म बेपत्ता छन्। बस र यात्रुको खोजीका लागि नेपाल प्रहरी, सशस्त्र प्रहरीका साथै भारतबाट समेत गोताखोर परिचालन गरिएको थियो ।
लामो समयको खोजीपछि पनि बस फेला नपरेपछि खोजी स्थगन गरिएको थियो।
