काठमाडौं, २४ पुस । प्रधानमन्त्री सुशीला कार्की र नेकपा एमालेका अध्यक्ष केपी शर्मा ओलीबीच बिहीबार बालुवाटारमा करिब तीन घण्टा लामो भेटवार्ता भएको छ ।
बिहान ११ बजेदेखि सुरु भएको छलफल दिउँसोसम्म चलेको थियो । बालुवाटार स्रोतका अनुसार भेटवार्ताको मुख्य एजेन्डा आगामी निर्वाचन केन्द्रित रहेको थियो ।
छलफलका क्रममा प्रधानमन्त्री कार्की र एमाले अध्यक्ष ओलीबीच देशको वर्तमान राजनीतिक अवस्था, निर्वाचनको तयारी, समयसीमा तथा दलहरूको भूमिकाबारे गहन कुराकानी भएको बताइएको छ ।
स्रोतका अनुसार अध्यक्ष ओलीले नेकपा एमाले तोकिएकै समयमा निर्वाचन हुनुपर्ने पक्षमा दृढ रहेको स्पष्ट पारेका थिए । उनले निर्वाचन सफल बनाउन एमाले पूर्ण रूपमा तयार रहेको र आवश्यक सहयोग गर्न पनि प्रतिबद्ध रहेको जानकारी गराएका थिए ।
प्रधानमन्त्री कार्कीले पनि समयमै निर्वाचन सम्पन्न गर्नु सरकारको प्राथमिकता रहेको बताउँदै राजनीतिक दलहरूबीच सहकार्य आवश्यक रहेको धारणा राखेकी थिइन् ।
