काठमाडौं, २४ पुस । अमेरिकाले ३१ राष्ट्रसंघीय निकायसहित ६६ वटा अन्तर्राष्ट्रिय संस्थाबाट बाहिरिने निर्णय गरेको छ ।
राष्ट्रपति डोनाल्ड ट्रम्पले बुधबार उक्त निर्णयमा हस्ताक्षर गरेसँगै ती संस्थाहरूमा जाने अमेरिकी आर्थिक सहयोग रोकिने ह्वाइट हाउसले जनाएको छ ।
ह्वाइट हाउसका अनुसार ती संस्थाहरू अमेरिकी राष्ट्रिय हित, सार्वभौमिकता र आर्थिक शक्तिसँग असंगत रहेको निष्कर्ष निकाल्दै सदस्यता समीक्षा पछि यस्तो कदम चालिएको हो ।
सूची सार्वजनिक नगरिए पनि जलवायु, श्रम, बसाइँसराइ, जनसंख्या र व्यापारसँग सम्बन्धित यूएन निकाय तथा केही गैर–यूएन संस्थाहरू यसमा परेका छन् ।
ट्रम्प प्रशासनले यी संस्थाहरूलाई ‘वोक एजेन्डा’, फजुल खर्च र गलत व्यवस्थापनको आरोप लगाएको छ । यसअघि पनि अमेरिका विश्व स्वास्थ्य संगठन, मानव अधिकार परिषद् र युनेस्कोजस्ता संस्थाबाट बाहिरिइसकेको छ ।
