काठमाडौं, २३ पुस । मन्त्री पदबाट राजीनामा दिएका कुलमान घिसिङले अब आफू पूर्ण रूपमा राजनीतिमा सक्रिय हुने घोषणा गरेका छन् ।
उज्यालो नेपाल बनाउने लक्ष्यसहित राजनीतिमा प्रवेश गरेको बताउँदै उनले भोलिदेखि नै सक्रिय राजनीतिक जीवन सुरु गर्ने स्पष्ट पारेका छन् ।
प्रधानमन्त्रीसहितका नेताहरूको आग्रहपछि घिसिङले बुधबार साँझ प्रधानमन्त्री सुशीला कार्कीलाई भेटेर राजीनामापत्र बुझाएका हुन् । राजीनामापछि सञ्चारकर्मीहरूसँग कुरा गर्दै उनले मन्त्री पदबाट बाहिरिए पनि जनताको पक्ष, राष्ट्रको हित र सत्यको बाटोबाट कहिल्यै नहट्ने प्रतिबद्धता जनाए ।
म पदबाट बाहिरिएको छु, तर जनताको पक्ष, राष्ट्रको हित र सत्यको बाटोबाट कहिल्यै बाहिरिने छैन,’ घिसिङले भने, ‘उज्यालो नेपाल बनाउन सशक्त रूपमा अबको मेरो बाटो राजनीतिक यात्रा हुनेछ, र यही बाटोमा अघि बढ्ने मेरो दृढ संकल्प छ ।
घिसिङले देशभित्र देखिएका समसामयिक समस्या, विद्यमान राजनीतिक परिस्थिति र अवस्थालाई परिवर्तन गर्न राजनीतिक नेतृत्वमा जान आवश्यक ठानेको बताए ।
लामो समय कार्यकारी जिम्मेवारीमा रहेर मन्त्रालयको काममा व्यस्त भएकाले खुला रूपमा राजनीति गर्न नपाएको उल्लेख गर्दै अब भने प्रत्यक्ष राजनीतिक भूमिकामा देखिने बताए । ‘अब त्यो समय आएको छ ।
भोलिदेखि नै मेरो राजनीतिक जीवन सुरु हुन्छ, र भोलिदेखि नै प्रभावकारी हुन्छ,’ उनले भने, ‘देशको वर्तमान अवस्था परिवर्तन गर्न राजनीतिक नेतृत्वमा जानकै लागि मैले आज मन्त्रिपरिषद्बाट राजीनामा दिएको हुँ ।
यसैबीच, घिसिङ र राष्ट्रिय स्वतन्त्र पार्टी (रास्वपा) बीच उपसभापति बन्ने विषयमा समझदारी भएको चर्चा भए पनि उक्त सहमति हालसम्म कार्यान्वयनमा नआएको उनले स्पष्ट पारे ।
उज्यालो नेपाल पार्टी र रास्वपाबीच भएको सहमतिमा मेरो नाम उल्लेख भए पनि त्यो समझदारी अहिलेसम्म लागू भएको छैन,’ उनले भने, ‘अहिलेसम्म मैले कुनै पनि राजनीतिक दलको सदस्यता लिएको छैन ।
