काठमाडौं, २२ पुस । नेपाली कांग्रेसको केन्द्रीय कार्यसम्पादन समिति बैठकमा सहभागी हुन सानेपा पुगेका कांग्रेस नेता विमलेन्द्र निधि र पार्टी केन्द्रीय कार्यालय परिसरमा प्रदर्शनरत एक समूहबीच चर्काचर्की भएको छ ।
पार्टी केन्द्रीय कार्यालय घेराउ गर्न पुगेका विशेष महाधिवेशन पक्षधर केही कार्यकर्ताहरूले नेता निधि लिंक रोड हुँदै कार्यालय प्रवेश गर्ने क्रममा अवरोध गरेका थिए । सो क्रममा कार्यकर्ताहरू र निधिबीच भनाभन चर्किँदै चर्काचर्कीको अवस्था सिर्जना भएको प्रत्यक्षदर्शीहरूले बताएका छन् ।
घटनासँग सम्बन्धित एक भिडियो सामाजिक सञ्जालमा भाइरल भएको छ । उक्त भिडियोमा नेता निधिले आक्रोशित हुँदै ‘को हो त्यो मान्छे ? ए को हो ? कांग्रेसी होइन यो, कांग्रेसी होइन’ भनेको स्पष्ट रूपमा सुनिन्छ । त्यसक्रममा प्रदर्शनरत समूहबाट ‘तपाईं चैं को हो ?’ भन्ने जवाफ पनि आएको भिडियोमा देखिन्छ ।
निधि पार्टी कार्यालयभित्र प्रवेश गरेपछि पनि होहल्ला केही समयसम्म जारी रहेको देखिन्छ । भिडियोमा ‘ओइ, आइजा’, ‘तेरो घर…’ जस्ता उत्तेजक आवाजहरू पनि सुनिनु आन्तरिक तनाव अझै गहिरो रहेको संकेतका रूपमा हेरिएको छ ।
यसैबीच, विशेष महाधिवेशन पक्षधर केन्द्रीय सदस्य मधु आचार्यले मंगलबार आफूहरूको तर्फबाट कुनै औपचारिक कार्यक्रम नरहेको दाबी गरेका छन् ।
