सर्लाही, २२ पुष । सर्लाहीको लालबन्दी नगरपालिका–१४ र १५ स्थित चुरे क्षेत्रमा गरिएको अवैध गाँजाखेती प्रहरीले नष्ट गरेको छ ।
चुरे क्षेत्रका कालिन्जोर, सिरुडाँडा र ब्लोन टोललगायत स्थानमा लगाइएका करिब दुई लाख बोट गाँजा सोमबार फडानी गरिएको जिल्ला प्रहरी कार्यालयले जनाएको छ ।
जिल्ला प्रहरी कार्यालयका अनुसार नेपाल प्रहरी र सशस्त्र प्रहरीका ४० जनाको टोलीले १३ बिघा क्षेत्रफलमा फैलिएको गाँजाखेती नष्ट गरेको हो । चालु आर्थिक वर्षमा मात्रै सर्लाहीमा ९४.५ बिघा क्षेत्रफलको गाँजाखेती नष्ट गरिसकिएको प्रहरीले जनाएको छ ।
