काठमाडौँ, २२ पुस । नेकपा (एमाले) का अध्यक्ष केपी शर्मा ओलीले सरकार र केही विदेशी शक्तिहरू मिलेर निर्वाचन सार्ने षड्यन्त्र गरिरहेको गम्भीर आरोप लगाएका छन् ।
मंगलबार च्यासलस्थित पार्टी कार्यालयमा जारी एमाले सचिवालय बैठकमा वर्तमान राजनीतिक परिस्थितिबारे ‘ब्रिफिङ’ गर्दै अध्यक्ष ओलीले तत्काल निर्वाचन हुने वातावरण अझै नबनेको दाबी गरे ।
बैठकमा सहभागी एक नेताका अनुसार ओलीले एमाले र नेपाली कांग्रेसबीच नजिकिँदो राजनीतिक समझदारीप्रति सरकार तथा केही बाह्य शक्तिहरू असहज बनेको उल्लेख गरेका थिए ।
अध्यक्ष ओलीले सचिवालय बैठकमा भने, “एमाले र कांग्रेस नजिकिँदै गएपछि सरकार र केही विदेशी शक्तिहरू निर्वाचनलाई सार्ने वा विभिन्न चरणमा विभाजन गरेर गराउने षड्यन्त्रमा लागेका छन् ।
उनका अनुसार यस्तो प्रवृत्तिले लोकतान्त्रिक अभ्यास र संविधान कार्यान्वयनलाई नै कमजोर बनाउने खतरा छ । उनले पछिल्लो समय देशमा वैदेशिक हस्तक्षेप नाङ्गो रूपमा देखिन थालेको समेत टिप्पणी गरे ।
“नेपालको अस्तित्व र राष्ट्रिय अखण्डता जोगाउने कार्य झन् चुनौतीपूर्ण बन्दै गएको छ,” ओलीले भने, “वैदेशिक हस्तक्षेप अब लुकाइएको छैन, खुला रूपमा देखिन थालेको छ ।
सचिवालय बैठकमा राष्ट्रिय सभाको आगामी निर्वाचन, वर्तमान सरकारको कार्यशैली, समसामयिक राजनीतिक अवस्था तथा पार्टीको आगामी रणनीतिबारे समेत छलफल भइरहेको छ ।
एमालेले लोकतान्त्रिक मूल्य र राष्ट्रिय स्वाधीनताको पक्षमा सशक्त रूपमा उभिनुपर्ने आवश्यकता रहेको अध्यक्ष ओलीको भनाइ थियो ।
