काठमान्डौँ, २१ पुष । वैदेशिक रोजगारीका लागि बेलायत (युके) पठाइदिने प्रलोभन देखाएर लाखौँ रुपैयाँ ठगी गरेको आरोपमा प्रहरीले तीन जनालाई पक्राउ गरेको छ ।
काठमाडौं उपत्यका अपराध अनुसन्धान कार्यालय टेकुको टोलीले पीडितहरूको उजुरीका आधारमा उनीहरूलाई नियन्त्रणमा लिएको हो । प्रहरीका अनुसार इन्द्रबहादुर केसी र आइते तामाङले मिलेर ७ जनालाई युके पठाइदिने भन्दै १३ लाख रुपैयाँ ठगी गरेका थिए ।
उनीहरूले कामको भिसा, प्रक्रिया छिटो हुने र सुरक्षित रूपमा युके पठाइदिने आश्वासन दिएर रकम असुली गरेको प्रारम्भिक अनुसन्धानबाट खुलेको छ । रकम लिएपछि भने पीडितहरूलाई विदेश नपठाई झुक्याइएको बताइएको छ ।
प्रहरीले इन्द्रबहादुर केसी र आइते तामाङलाई बिहीबार काठमाडौंको गोंगबु क्षेत्रबाट पक्राउ गरेको हो भने विजय गुरुङलाई आइतबार काठमाडौं महानगरपालिका–१४ क्षेत्रबाट नियन्त्रणमा लिएको जनाएको छ ।
पक्राउ परेकामाथि थप अनुसन्धान तथा कानुनी कारबाही प्रक्रिया अघि बढाइएको छ । इन्द्रबहादुर केसी र आइते तामाङलाई आवश्यक कारबाहीका लागि जिल्ला प्रहरी परिसर काठमाडौं पठाइएको छ भने विजय गुरुङलाई वैदेशिक रोजगार विभाग ताहाचल पठाइएको प्रहरीले जानकारी दिएको छ ।
प्रहरीले वैदेशिक रोजगारीका नाममा हुने यस्ता ठगीप्रति सचेत रहन सर्वसाधारणलाई आग्रहसमेत गरेको छ ।
