जनकपुर, २० पुस । टिकटकमा एकअर्काको धर्म र संस्कृतिलाई लक्षित गरी गरिएको अभद्र टिप्पणीका कारण मधेश प्रदेशमा तनावपूर्ण अवस्था सिर्जना भएको छ ।
धनुषामा सुरु भएको घटनाको प्रभाव पर्साको वीरगञ्जसम्म फैलिँदा सुरक्षा निकायले मधेशभर सतर्कता बढाएका छन् । धनुषा र पर्सासहित मधेश प्रदेशका आठै जिल्लामा सुरक्षा सतर्कता कडा पारिएको छ ।
एक उच्च सुरक्षा अधिकृतका अनुसार पछिल्लो घटनाक्रमलाई ‘संवेदनशील परिस्थिति’को रूपमा मूल्यांकन गर्दै थप सुरक्षाकर्मी परिचालन, गस्ती वृद्धि र सम्भावित भिडभाड हुने स्थानमा निगरानी बढाइएको छ ।
केही दिनअघि जनकपुरमा हैदर अन्सारी र अमानत अन्सारी नाम गरेका युवाहरूले टिकटकमा हिन्दुस्तानको नाम उल्लेख गर्दै भिडियो पोस्ट गरेका थिए । उक्त भिडियो धार्मिक सहिष्णुतामा खलल पुग्ने खालको रहेको भन्दै स्थानीय अगुवा तथा समुदायका प्रतिनिधिहरूले दुवै युवालाई प्रहरीको जिम्मा लगाएका थिए ।
इलाका प्रहरी कार्यालय खजुरीमा दुवै पक्षबीच छलफल भइरहेको अवस्थामा ती युवाहरू पक्राउ गरिएको भन्दै केही समूह आक्रोशित बनेका थिए । सोही क्रममा स्थिति नियन्त्रण बाहिर जाँदा मस्जिदमा आक्रमणसमेत भएको थियो ।
घटनापछि प्रहरीले तत्काल हस्तक्षेप गर्दै स्थिति नियन्त्रणमा लिएको धनुषाका प्रहरी प्रवक्ता डिएसपी गणेश बमले जानकारी दिए । उनका अनुसार मस्जिद आक्रमणमा संलग्न व्यक्तिलाई समेत पक्राउ गरिएको छ र घटनाको थप अनुसन्धान भइरहेको छ ।
धनुषाको उक्त घटनालाई लिएर पर्साको वीरगञ्जमा आज बिहानैदेखि प्रदर्शन भइरहेको छ । प्रदर्शनका क्रममा सम्भावित अप्रिय घटना हुन नदिन सुरक्षा व्यवस्था कडा बनाइएको छ ।
वीरगञ्जका संवेदनशील क्षेत्र, धार्मिक स्थल र मुख्य चोकहरूमा प्रहरी तथा सशस्त्र प्रहरी परिचालन गरिएको छ । सुरक्षा निकायले सबै पक्षलाई संयम अपनाउन, सामाजिक सञ्जालमा उत्तेजक सामग्री नपोस्ट गर्न र कानुन हातमा नलिन आग्रह गरेको छ ।
साथै, शान्ति, सद्भाव र आपसी सहिष्णुता कायम राख्न स्थानीय समुदाय, धार्मिक अगुवा र नागरिक समाजसँग समन्वय गरेर काम भइरहेको बताइएको छ ।
