जनकपुर, ८ पुष । एक सातादेखि लगातार बढेको चिसो र शीतलहरका कारण मधेस–तराई क्षेत्रको जनजीवन अत्यन्त कष्टकर बनेको छ । विशेषगरी दैनिक ज्यालादारी मजदुर, दलित बस्तीका बासिन्दा, बालबालिका तथा वृद्धवृद्धा बढी प्रभावित भएका छन्।
अत्यधिक चिसोका कारण काममा जान नसक्दा गरिब तथा विपन्न परिवारको दैनिकी झनै कठिन बन्दै गएको छ ।शुक्रबारदेखि तराईका जिल्लाहरूमा घाम नलागी बिहान बाक्लो हुस्सु, कुहिरो र शीतलहर जारी छ । दिउँसो केही समय मौसम खुले पनि चिसो कम भएको छैन ।
प्रतिकूल मौसमका कारण बालबालिकाको स्वास्थ्यमा असर पर्न सक्ने भन्दै बारा जिल्लाका केही स्थानीय तहले विद्यालय बन्द गरेका छन । परवानीपुर गाउँपालिकाका अध्यक्ष रामक्षत्रीप्रसाद कुर्मीले पालिकाभित्रका निजी तथा सामुदायिक विद्यालयहरू शुक्रबारसम्म बन्द गरिएको जानकारी दिए ।
यस्तै, जीतपुर सिमरा उपमहानगरपालिकाले पनि चिसो र शीतलहरका कारण बुधबारदेखि शुक्रबारसम्म विद्यालय पठनपाठन स्थगित गरेको जनाएको छ ।
