काठमाडौं, ८ पुस । जेनजी विद्रोहका मागहरू अझै पूरा नभएको भन्दै मिरज ढुंगानाको नेतृत्वमा रहेको समूहले मंगलबार पनि सरकारविरुद्ध प्रदर्शनलाई निरन्तरता दिएको छ ।
प्रदर्शनकारीहरूले सरकार जनआवाज र जेनजी विद्रोहको भावना अनुसार अघि नबढेको आरोप लगाउँदै काठमाडौंको माईतीघर मण्डलामा भेला भएर विरोध जनाएका हुन् ।
प्रदर्शनमा सहभागी जेनजी समूहले मुलुकमा व्याप्त भ्रष्टाचार नियन्त्रण, सुशासनको स्थापना तथा युवाको आवाजलाई राज्यले गम्भीरतापूर्वक सुन्नुपर्ने माग राखेका छन् ।
उनीहरूका अनुसार सरकार निर्वाचन र सत्ता केन्द्रित राजनीतिक खेलमा मात्र सीमित भएको छ, तर युवाले उठाएका सुशासन, पारदर्शिता र जवाफदेहिताका मुद्दा बेवास्ता गरिएको छ ।
यसअघि सोमबार भएको प्रदर्शनका क्रममा प्रहरीले हस्तक्षेप गर्दै प्रदर्शनकारीहरूमाथि धरपकड गरेको थियो। सो क्रममा जेनजी विद्रोहका अगुवा मिरज ढुंगाना सहित केही प्रदर्शनकारीलाई नियन्त्रणमा लिइएको थियो।
उक्त घटनाप्रति आक्रोश व्यक्त गर्दै मंगलबारको प्रदर्शनमा प्रहरी दमनको विरोध पनि प्रमुख एजेन्डा बनेको छ । प्रदर्शनकारीहरूले ‘जेनजीको माग हरायो, निर्वाचन भनि करायो’, ‘अति भो राजनीतिक खेल, आमा सरकार फेल’, ‘घाइतेका माग पूरा गर’, ‘जेन–जीको माग चुनाव होइन, सुशासन हो’ जस्ता नारा लेखिएका प्लेकार्ड प्रदर्शन गरेका थिए ।
