जनकपुर, ६ पुस । मधेस प्रदेशका नवनिर्वाचित सभामुख रामअशिष यादवले पद तथा गोपनीयताको शपथ लिएका छन् ।
प्रदेश सभाबाट सभामुखमा निर्वाचित भएको केही घण्टामै आइतबार राति उनले औपचारिक रूपमा शपथग्रहण गरेका हुन् । प्रदेश प्रमुखको कार्यालयद्वारा आयोजित शपथग्रहण कार्यक्रममा प्रदेश प्रमुख सुरेन्द्र लाभले सभामुख यादवलाई पद तथा गोपनीयताको शपथ गराएका थिए ।
शपथग्रहण समारोहमा प्रदेश सरकारका मन्त्रीहरू, प्रदेशसभा सदस्यहरू, राजनीतिक दलका प्रतिनिधि तथा उच्च अधिकारीहरूको उपस्थिति रहेको थियो । मत विभाजन प्रक्रियामार्फत यादव सभामुखमा निर्वाचित भएका थिए ।
उनले प्रदेशसभामा बहुमत प्राप्त गरेपछि उपसभामुख बबिता राउत इशरले उनलाई सभामुख निर्वाचित भएको घोषणा गरेकी थिइन् । सभामुखको शपथसँगै अब मधेस प्रदेशसभाको कार्यसूची सञ्चालन, नीति निर्माण प्रक्रियाको सहजीकरण तथा सदनको मर्यादा कायम राख्ने महत्वपूर्ण जिम्मेवारी यादवको काँधमा आएको छ ।
शपथपछि सभामुख यादवले प्रदेशसभालाई निष्पक्ष, मर्यादित र जनमुखी बनाउने प्रतिबद्धता व्यक्त गर्दै संविधान, कानुन र लोकतान्त्रिक मूल्य–मान्यताको पालना गर्दै सदन सञ्चालन गर्ने बताएका छन् ।
