जनमपुर, २७ मंसिर । रौतहटको माधवनारायण नगरपालिका–६, माधोपुरमा विद्युत् सर्ट हुँदा एक फुसको घरमा आगलागी भई पूर्ण रूपमा नष्ट भएका छन् ।
शुक्रवार राति करिब ११ः५० बजे सतनारायण यादवका ४० वर्षीय छोरा भोजेन्द्र राय यादवको खरको छानो भएको घरभित्रको विद्युत् तार सर्ट भई आगो लागेको प्रहरीले बताए ।
आगलागीबाट घरमा भण्डारण गरिएको धान, गहुँ, लत्ताकपडा, फर्निचर, गरगहना तथा नगद १ लाख ५० हजार रुपैयाँसहित करिब ८ लाख रुपैयाँ बराबरको धनमाल क्षति भएको प्रारम्भिक अनुमान गरिएको छ ।
जिल्ला प्रहरी कार्यालय रौतहटका प्रवक्ता डीएसपी विष्णुप्रदीप बस्यालका अनुसार घटनामा कुनै मानवीय वा चौपाया क्षति भएको छैन ।
आगो लागेको खबर पाउनासाथ प्रहरी चौकी माधोपुरबाट खटिएको टोली र स्थानीय बासिन्दाको सहयोगमा करिब १२ः५५ बजे आगो पूर्ण रूपमा नियन्त्रणमा लिइएको थियो । घटनाबारे थप अनुसन्धान भइरहेको प्रहरीले जनाएको छ ।
