जनकपुर, १० मङ्सिर। मधेश प्रदेशका नवनियुक्त ऊर्जा, सिचाइ तथा खानेपानी मन्त्री लखन दास तत्मालाई आज मन्त्रालयमै पुगेर क्षेत्रीय मतदाताहरूले बधाई तथा सम्मान गरेका छन्।
मन्त्री पदमा जिम्मेवारी पाएपछि जनप्रतिनिधि, स्थानीय नेता, कार्यकर्ता तथा सर्वसाधारण मतदाताहरू समूहगत रूपमा मन्त्रालय पुगेका थिए।
मतदाताहरूले मन्त्री तत्मालाई फूलमाला र शुभेच्छापत्र प्रदान गर्दै ऊर्जा, सिचाइ र खानेपानी क्षेत्रमा दीर्घकालीन सुधार तथा प्रभावकारी सेवा विस्तारको अपेक्षा व्यक्त गरेका छन्।
उनीहरूले विशेषगरी ग्रामीण बस्तीमा खानेपानीको अभाव, सिंचाइ प्रणालीको कमजोर अवस्था र विद्युत् व्यवस्थित वितरणका चुनौती समाधानमा मन्त्रीले प्रभावकारी भूमिका खेल्ने विश्वास व्यक्त गरे।
मन्त्री लखन दास तत्माले आफूलाई दिएको विश्वासप्रति आभार व्यक्त गर्दै प्रदेशका नागरिकलाई प्रत्यक्ष प्रभाव पार्ने ऊर्जा, सिचाइ र खानेपानीका योजनाहरूलाई प्राथमिकताका साथ कार्यान्वयन गर्ने प्रतिबद्धता व्यक्त गरे।
