जनकपुर, ३ मंसिर । मधेश प्रदेशका सभामुख रामचन्द्र मण्डल पदअनुकूल आचरण नगरेको भन्दै प्रस्तुत प्रस्ताव दुई–तिहाइ बहुमतले पारित भएसँगै पदमुक्त भएका छन् ।
बुधबारको प्रदेश सभा बैठकमा ७८ मध्ये ७६ सांसदले प्रस्तावको पक्षमा मत दिए । सात दलीय गठबन्धनका ६४ सांसदले दर्ता गराएको प्रस्तावलाई उपसभामुख बबिता कुमारी राउत ईशरले छलफलपछि मतदानमा लगेर पारित भएको घोषणा गरिन् ।
विभिन्न दलका सांसदले छलफलमा आफ्ना धारणा राखेपछि प्रस्ताव निर्णयार्थ पेस गरी मत विभाजनमार्फत पारित गरिएको हो ।
