जनकपुर, २४ कार्तिक । मधेश प्रदेशकी प्रमुख सुमित्रा देवी भण्डारीले बर्दिबासको होटल पानसमा नेकपा एमाले संसदीय दलका नेता सरोज कुमार यादवलाई प्रदेशको नयाँ मुख्यमन्त्री नियुक्त गरेकी छिन् ।
यो निर्णयले मधेशको राजनीति तरंगित बनेको छ । निवर्तमान मुख्यमन्त्री जितेन्द्र सोनलले यस कदमलाई ‘मधेशमाथिको धोका’ भन्दै विरोध गरेका छन् ।
विडम्बना, उनको गठबन्धनकी सांसद बिमला अन्सारीले आइतबार संविधानको धारा १६८(२) अनुसार सरकार बनाउने अपिल गरेकी थिइन् तर सोमबार धारा १६८(३) अनुसार गठन भएको सरकारमा विनाविभागीय मन्त्री बनेकी छिन् ।
अन्सारीसँगै एमालेका लखन दास तत्मा र राप्रपाकी सांसद कञ्चन बिच्छाले पनि विनाविभागीय मन्त्रीका रूपमा शपथ लिएका छन् ।
