काठमाडौं, २० कात्तिक । जेनजी आन्दोलनका अगुवा सुदन गुरुङले गृहमन्त्री ओमप्रकाश अर्यालमाथि तीव्र असन्तुष्टि प्रकट गरेका छन् ।
उनले सामाजिक सञ्जालमार्फत गृहमन्त्री अर्याललाई ‘अलोकप्रिय’ नेता भन्दै आलोचना गरेका हुन ्। गुरुङले जेनजी आन्दोलनका क्रममा भएको दमनका जिम्मेवारहरूलाई कारबाही नगरेको भन्दै गृहमन्त्रीमाथि आक्रोश पोखेका छन् ।
उनले लेखेका छन्, ‘तपाईंले जनताको भरोसा पूरा गर्न सक्नुभएन । देशभरबाट “हत्यारालाई कारबाही गर”, “भ्रष्टाचारीलाई कारबाही गर” भन्ने आवाज उठिरहँदा तपाईं भने “जेनजीलाई कारबाही गर” भन्नेहरूको कुरा सुन्ने गृहमन्त्री बनेर बस्नु राष्ट्रप्रति अपमान हो ।’ उनले गृहमन्त्री अर्याललाई ‘शहीदको रगत र नेपाली जनताको आशा सम्झन’ आग्रह गरेका छन् ।
गुरुङका अनुसार अब गृहमन्त्रीसँग कुनै आशा बाँकी छैन । गुरुङले जेनजी आन्दोलनको उद्देश्य आगामी २०८४ सालको निर्वाचन २०८२ मा सार्ने होइन भन्दै स्पष्ट पारेका छन् । उनका शब्दमा, ‘यो आन्दोलन चुनाव सार्ने होइन, जनताको माग सम्बोधनका लागि हो ।
नेपाली जनताको आवाज बेवास्ता गरिए यसपालि चुनाव हुन दिइने छैन ।’ त्यस्तै, उनले प्रधानमन्त्री सुशीला कार्कीसँग नजिकका पात्र बनेर गृहमन्त्रीको पद जोगाउने प्रयास नगर्न चेतावनी दिएका छन् ।
गुरुङले भनेका छन्, ‘यदि अझै पनि पदमा टाँसिएर बस्ने हो भने दुई दिनपछि हुने प्रेस कन्फ्रेन्सले तपाईंको भविष्य निर्धारण गर्नेछ । प्रधानमन्त्रीको प्रिय पात्र भएर कुर्सी टिकाउने सोच तपाईंको भ्रम हो ।’
