जनकपुर, १८ कार्तिक । धनतेरस पर्वको पूर्वसन्ध्यामा सुनचाँदी बजारमा भएको प्रहरी कारबाहीको विरोधमा जनकपुर उद्योग वाणिज्य संघले बजार बन्द गर्दै विरोध प्रदर्शन गरेको छ ।
प्रहरीद्वारा संघका अध्यक्ष सुरेन्द्र भण्डारीमाथि गरिएको कुटपिटको विरोधमा व्यापारीहरूले बिहान ९ देखि १२ बजेसम्म पसल बन्द गरी प्रदर्शन गरेका हुन् ।
यसअघि व्यापारीहरूले कालो झण्डा र कालोपट्टी बाँधेर पहिलो चरणको विरोध जनाएका थिए । सुनचाँदी बजारमा प्रहरीले छापा मार्दै ७ किलो चाँदी नियन्त्रणमा लिएपछि विवाद सुरु भएको हो ।
व्यापारीहरूले प्रहरीमाथि लुटपाट र दमनको आरोप लगाउँदै निष्पक्ष छानबिन र दोषीमाथि कारबाहीको माग गरेका छन् ।
