काठमाडौं, १६ कात्तिक । प्रधानमन्त्री सुशीला कार्कीले सात प्रदेशका मुख्यमन्त्रीसँग बैठक आज अपराह्न चार बजे प्रधानमन्त्री निवास बालुवाटारमा आह्वान गरेकी छन् ।
प्रधानमन्त्री कार्कीको सचिवालयका अनुसार हालको परिवर्तित राजनीतिक तथा प्रशासनिक परिस्थितिमा संघीय र प्रादेशिक सरकारबीच समन्वय र सहकार्यलाई थप सुदृढ बनाउन बैठक आयोजना गरिएको हो ।
बैठकमा कोशी प्रदेशका मुख्यमन्त्री हिक्मतबहादुर कार्की, मधेश प्रदेशका जितेन्द्रप्रसाद सोनार, बागमती प्रदेशका इन्द्रबहादुर बानियाँ, गण्डकी प्रदेशका सुरेन्द्रराज पाण्डे, लुम्बिनी प्रदेशका चेतनारायण आचार्य, कर्णाली प्रदेशका यामलाल कँडेल र सुदूरपश्चिम प्रदेशका कमलबहादुर शाहलाई सहभागी हुन निमन्त्रणा दिइएको प्रधानमन्त्री सचिवालयले बताए ।
बैठकमा संघीय–प्रादेशिक सहकार्यका उपाय, नीति तथा कार्यक्रमको कार्यान्वयन र विकास परियोजनाको प्रभावकारी सञ्चालनका विषयमा छलफल हुने अपेक्षा गरिएको छ ।
