काठमाडौँ, ६ कात्तिक । सरकार र जेनजीबीच छिट्टै लिखित सम्झौता हुने भएको छ ।
राष्ट्रपति रामचन्द्र पौडेलको उपस्थितिमा हुन लागेको उक्त सम्झौताका लागि मस्यौदा तयारी अन्तिम चरणमा पुगेको सरकारी स्रोतले जनाएको छ ।
२०६३ सालको विस्तृत शान्ति सम्झौताजस्तै ढाँचामा यो सम्झौता तयार पारिँदैछ । हाल सरकारका मुख्य सल्लाहकार अजयभद्र खनालको संयोजनमा आठ वटा जेनजी समूहसँग संवाद र छलफल चलिरहेको छ ।
औपचारिक वार्ता सफल भए लगत्तै राष्ट्रपतिको उपस्थितिमा लिखित सम्झौतामा हस्ताक्षर हुने तयारी भएको बताइएको छ । गत असोजमा राष्ट्रपति भवन शीतल निवासमा भएका दुई चरणका छलफलमा आन्दोलनकारीहरूले आफूहरूलाई ‘आतंककारी’ भनिन थालेको गुनासो गर्दै आन्दोलनको वैधता सुनिश्चित गर्न लिखित सम्झौता गर्नुपर्ने माग राखेका थिए ।
त्यसपछि राष्ट्रपति पौडेलले आन्दोलनको योगदान र वैधतालाई स्वीकार गर्दै सहमतिको मार्ग खोल्ने संकेत दिएका थिए । प्रधानमन्त्री सुशीला कार्की, गृहमन्त्री ओमप्रकाश अर्याल, ऊर्जामन्त्री कुलमान घिसिङसहितका मन्त्रीहरूले सो वार्तामा भाग लिएका थिए ।
सरकारले जेनजी, घाइते र सहिद परिवारका प्रतिनिधिसँग सहमति गरी आन्दोलनका मुद्दा दस्तावेजीकरण र समाधान गर्ने तयारी गरेको छ ।
सुरक्षा निकायका अनुसार हाल करिब २५ वटा जेनजी नामका समूह सक्रिय रहेका छन्, जसलाई एकीकृत गर्ने उद्देश्यले यो लिखित सम्झौता गर्न लागिएको हो ।
सरकारी स्रोतका अनुसार, “सम्झौताले आन्दोलनकारी र सरकारबीचको सम्बन्धलाई औपचारिकता दिनुका साथै राजनीतिक स्थिरता र आगामी निर्वाचन तयारीमा सहजता ल्याउने अपेक्षा गरिएको छ ।
