काठमाडौं, ३१ असोज । गृहमन्त्री ओमप्रकाश अर्यालले भदौ २३ र २४ गते भएको जेनजी आन्दोलनमा केही व्यक्तिको उग्र व्यवहारका कारण नेपाल प्रहरीले ठूलो क्षति भोग्नुपरेको जनाएका छन् ।
७०औं प्रहरी दिवसको अवसरमा शुक्रबार आयोजित समारोहमा बोल्दै मन्त्री अर्यालले घटनामा सुरक्षाकर्मीको ज्यान गएकोप्रति दुःख व्यक्त गरे ।
उनले प्रहरीमात्र होइन, आम नागरिकको दैनिक जीवनसमेत प्रभावित भएको उल्लेख गरे । त्यसका बाबजुद पनि प्रहरी संगठनले देखाएको प्रतिबद्धता, धैर्यता र जिम्मेवारीको उनले प्रशंसा गरे ।
‘देशको समृद्धि र सुशासनको आधार बलियो आन्तरिक सुरक्षा प्रणाली हो,’ उनले भने, ‘प्रविधिमा आएको तीव्र परिवर्तनसँगै अपराधको स्वरूप पनि बदलिँदै गएको छ, जसले अनुसन्धान कार्यलाई झनै चुनौतीपूर्ण बनाइरहेको छ ।’
उनले मन्त्रालय प्रहरी संगठनलाई आवश्यक स्रोत र प्रविधिमा सक्षम बनाउन प्रयासरत रहेको जनाएको छ ।
